Joh 11 | NAS | STEP | Niiꞌnaꞌmung tee, naning Lasarusi tampaakoꞌnung, Beetani-navuntuꞌkoo otokoꞌnung siipavouꞌ. Teꞌ eeꞌnooꞌ Beetani Maaria-namainta otorekoꞌnooꞌ Maataꞌ.

John 11

Jiisuuꞌ Jerusalemaꞌaape Nanuko Ovontunge Tee Dupisiꞌkoo Piavorouꞌnaꞌ

(11:1–12:50)

Lasarusi Booꞌparuꞌnaꞌ

1 Niiꞌnaꞌmung tee, naning Lasarusi tampaakoꞌnung, Beetani-navuntuꞌkoo otokoꞌnung siipavouꞌ. Teꞌ eeꞌnooꞌ Beetani Maaria-namainta otorekoꞌnooꞌ Maataꞌ. 2 Teni eeꞌnani Meeriꞌ Jiisuuꞌkoo tampaꞌ nuuraaꞌ kauꞌkoo duuni dakovuuꞌnani eeꞌnoko napoꞌ dapoi piuꞌuuꞌ aaꞌnani. Lasarusi teni baꞌmari siipavouꞌnung. 3 Eeꞌnoko baꞌmari-kaarai Jiisuuꞌanko kara nanuꞌantavurema aaꞌpuretuꞌ, “Ovoring, tee daꞌmaikoꞌ siipavomang.”

4 Jiisuuꞌke taaravuraiꞌnange aaꞌpuruꞌ, “Lasarusi siipavomang, nka booaukaꞌnung. Siipa tavoꞌaringe Kumponing-nung meenasi tavoꞌantavuuꞌnaang. Eeꞌnoko aung siipa kompui Kumponinge ning Bauring meenasi amuuꞌnaang.” 5 Maataꞌnamaiaꞌ eeꞌnoko Lasarusi Jiisuuꞌke aaꞌnaꞌ piaavurikoꞌ. 6 Eeꞌnoko Lasarusi siipavoko Jiisuuꞌke taaravura tamung keꞌmunta doong otouꞌ. 7 Keꞌmunta doong tankinuioꞌ tee, teie niiꞌ bakaning barevare-nupoong aaꞌmuruꞌ, “Meriaing; nanampiaing; Judiaꞌnameng-aape toromariaing.”

8 Eeꞌnoko niiꞌke bakaning barevare-nupoonge makuꞌampima aaꞌpampiruꞌ, “Nau-anta Pankaing ee, teꞌmung Juꞌkoong ovontunge daꞌ daping kapange tooꞌdaieeng. Arekeeꞌ mauꞌemaang teꞌaape tororaraaꞌnaang?”

9 Jiisuuꞌke aaꞌmuruꞌ, “Tee batei narung doong-koong niiꞌkoo sirakaꞌpari otong. Nantoong doonganang nanaama puꞌariaung arakai kansiꞌkoonge sirakaꞌpui otoko. 10 Teka muunga deekoꞌ nanaama puꞌaripeuꞌ, aming-koo, nnaꞌ tee araka otoaꞌ.” 11 Jiisuuꞌke teeꞌpura napoꞌ aaꞌmuruꞌ, “Niikaang naning Lasarusi aatui otong, nka nanamira daaꞌampaing.”

12 Eeꞌnoko niiꞌke bakaninge aaꞌpampiruꞌ, “Ovoring, tee aatura tampaꞌ deeꞌooꞌnaang.” 13 Nka Jiisuuꞌke Lasarusi booꞌparuꞌnung naumuriko niiꞌke noruꞌampiaꞌ, tamung aatuuꞌnung pinaꞌ minkuvuko tampampima. 14 Teketa tee tenang Jiisuuꞌke koontoꞌ naumurima aaꞌmuruꞌ, “Lasarusi aaꞌ booꞌparing. 15 Nka tee ninka oꞌnorearuing-koo dotumaring diiꞌke masikaꞌantameriiꞌnaang noruꞌamira. Aiaꞌ, tee-anko nanamping.”

16 Toomasi, niiꞌnooꞌ miring Pauroong tampampimaunge, niiꞌ baꞌmarang aaꞌmuruꞌ, “Aiaꞌ meriaing Nau-anta ninka, niiꞌ ookara tee ninka nariꞌ moompiainaꞌ.”

Jiisuuꞌ Booꞌketa Daaꞌnung Tamparuꞌnaꞌ

17 Eeꞌnoko Jiisuuꞌke pora oovuuꞌ Lasarusi karenaumo doong kuvi dakoꞌdomanooꞌ otoioꞌ. 18 Beetani-namono Jerusalemaꞌketa narung kokoreiꞌ daangaꞌpinaꞌ basinooꞌ. 19 Eeꞌnoko mmauꞌ Juꞌnupoong porokoꞌ Maataꞌnamainta Meeriꞌ dunsirunsi-antavaarema~ beeꞌmari booꞌparuꞌnung-koo.

20 Eeꞌnoko Maataꞌke Jiisuuꞌ pokoꞌnung taaravuraiꞌnange taung nanuuꞌ kuneꞌuuꞌnaang, eeꞌnoko Meeriꞌ pava-koo otoko. 21 Maataꞌke aaꞌpuuꞌ Jiisuuꞌ, “Ovoring, daꞌ aꞌ otoieeng dei mmari booarupeuꞌ. 22 Nka ninge noruꞌansi oꞌnong Kumponinge arupeuꞌ kapooꞌ niaꞌepeuꞌnung.”

23 Jiisuuꞌke aaꞌpuuꞌ, “Daꞌmari domamparaaꞌnaang.”

24 Tenie makuꞌuma aaꞌpuuꞌ, “Noruꞌansi oꞌnong tee daaꞌaravaing doong asiꞌnooꞌnaꞌmung.”

25 Jiisuuꞌke teni aaꞌpuuꞌ, “Ning aaꞌ naning booꞌketa daaꞌnunge, domang-antai. Baa tee ning masikaꞌantamumaung domamparavaing bane booꞌparavainge. 26 Eeꞌnoko baa tee domampari ning masikaꞌantamumaung booꞌparavaukaꞌnung. Dake ee masikaꞌantavemang aung?” 27 Tenie aaꞌpuuꞌ, “Eeꞌ, ee Ovoring, masikaꞌantavamang daꞌ tee Karistooꞌ, Kumponing Bauring, tee Kumponinge teroita Pakoꞌpariꞌniiꞌ aꞌ kansiꞌkoo pora niiꞌ domamuriaing-koo.”

Jiisuuꞌ Biromparuꞌnaꞌ Lasarusi Booꞌparioꞌ

28 Eeꞌnoko teeꞌ minkuvura Maataꞌ baaraꞌmaꞌnaang-anko Meeriꞌanko toroarara baka aaꞌpuuꞌ, “Nau-anta ankaꞌ otong, daꞌ niaꞌdumaang.” 29 Eeꞌnoko Meeriꞌke tee kara taaravuraiꞌnange daaꞌarara kuaꞌpari nanuuꞌ kuneꞌuuꞌnaang. 30 Jiisuuꞌ mmeꞌ tavoꞌaravaruko osi, teꞌ Maataꞌke kuneꞌuuꞌnooꞌ naroꞌ otoko. 31 Eeꞌnoko niiꞌning Juꞌnupoong teva-koo kuung otorokoꞌnung Meeriꞌ ninka teni dunsirunsi-antavaama. Teketa teni iriꞌnarung daaꞌarara tenkenuko siompauꞌ, eeꞌ noruꞌaama, “Teni deeꞌma kuvi dakoꞌdoma-aape nanumang teke biromparaaꞌnaang.”

32 Eeꞌnoko Meeriꞌ tavoꞌaruꞌ Jiisuuꞌ otokoꞌnooꞌ. Eeꞌnoko tenie oovuraiꞌnange kauꞌkanooꞌ duaꞌaruꞌ aaꞌpuma, “Ovoring, daꞌ otoieeng dei mmari booꞌparavarupeuꞌ.”

33 Eeꞌnoko Jiisuuꞌke teni biromparako oovura eeꞌnoko Juꞌnupoong teni ninka porouꞌning birompariko oovurira bakaang domang aaꞌnaꞌ orarunsie mankiꞌouꞌ.

34 Eeꞌnoko Jiisuuꞌke niaꞌurima, aaꞌpuruꞌ, “Areꞌ dakoꞌerieenge?” Eeꞌnoko teinge bokuaama aaꞌpauꞌ, “Ovoring, pora ooveaing.” 35 Eeꞌnoko Jiisuuꞌ biromparuꞌ. 36 Eeꞌnoko Juꞌnupoonge aaꞌpauꞌ, “Ooveriaing aaꞌnaꞌ piaavumanaꞌ.” 37 Eeꞌnoko niiꞌninge aaꞌpauꞌ, “Teie tee temuꞌ naning duta mutuu tamparuꞌantavuuꞌ, apeꞌ? Arekeeꞌ aꞌmung Lasarusi booꞌparavarooꞌnaang kapooꞌ nkovuaruiee?”

Jiisuuꞌke Lasarusi Booꞌketa Daaꞌuuꞌnaꞌ

38 Napoꞌ aaꞌnaꞌ orakaꞌ deeꞌoitaaꞌ Jiisuuꞌ nanuuꞌ kuvi dakoꞌdoma-aape. Tee kuvi kapange daꞌpauꞌnung. 39 Jiisuuꞌke botovurima aaꞌpuruꞌ, “Tee kapang diiriꞌeriai.”

Eeꞌnoko Maataꞌke, tee naning booꞌparuꞌnung baꞌmarie aaꞌpuuꞌ, “Ee Ovoring, orakaꞌ kaꞌmiꞌmoriꞌneeng. Tee karenang doong tankinuieeng booꞌparioꞌ.”

40 Jiisuuꞌke aaꞌpuuꞌ, “Ninge nauransing daꞌ ning masikaꞌantameaing deekoꞌ Kumponing bakaang meenasi ooveaing. Aiꞌ daꞌ ampaꞌdoinge?”

41 Eeꞌnoko tee boiaꞌ diiriꞌauꞌ kuvi dakoꞌdoma karanaang-eta. Diiriꞌaioꞌ Jiisuuꞌke ankamparara aaꞌpuuꞌ, “Mmaꞌ ee, tampara tantamang dake nkaang eenta taaramemaung-koo. 42 Ninge noruꞌansi oꞌnong dake doong kante taaramemaung. Ninge teeꞌ nauransing nantoonge taaramaara masikaꞌantamaavaꞌnaang dake botomeuꞌnung ning.”

43 Eeꞌnoko teeꞌ minkuvuraiꞌnange aaꞌnaꞌ bokuma aaꞌpuuꞌ, “Lasarusi, sirapoꞌ poai!” 44 Eeꞌnoko tee booꞌparuꞌnung sirapoꞌ pouꞌ bakaang bireng eeꞌnoko kauꞌ daiꞌaritaaꞌnange baaronge, bakaang oing baaronge daiꞌaritaaꞌ. Eeꞌnoko Jiisuuꞌke botovurima aaꞌpuruꞌ, “Dapaꞌeriaing nanuainaꞌ.”

Ovontunge Mumunsiauꞌnaꞌ Jiisuuꞌ Tavaavaꞌnaang

(Mat 26:1-5; Mak 14:1-2; Luk 22:1-2)

45 Mmauꞌ Juꞌnupoong Meeriꞌ siompauꞌning Jiisuuꞌke kapooꞌ nkovuuꞌnung ooaaraiꞌnange masikaꞌantavauꞌ. 46 Eeꞌnoko narionge Boto Keperuuꞌnavitu-anko toroariraiꞌnange nauaaruꞌ kapooꞌ Jiisuuꞌke nkovuuꞌnung. 47 Teketa tee, taaravaaraiꞌnange Boto Keperuuꞌnavitue eeꞌnoko piristiꞌnuka-koo ovontunankai koompaaraꞌnavitu ninka mumunsinang nkoaama aaꞌpauꞌ, “Arekeeꞌ nkoampiiꞌnaang? Aung naning baruꞌ mmauꞌ taaꞌniꞌanta nkovumaatoing. 48 Niiꞌke tamung ooampiaing deekoꞌ aung mmauꞌke daurarong~pinaꞌ masikaꞌantavaara Roomaꞌnupoong beiꞌbeiꞌaariko teinge niiꞌ ookara piniraakuꞌmaariaing dootuuꞌnava pankava nariꞌ pesiꞌaama.”

49 Narunge naninge miring Kaiapasie Piristiꞌkoo Ovoring deempari otokoꞌnunge aaꞌpuruꞌ, “Diiꞌke kapooꞌ noruꞌeriaꞌ. 50 Diiꞌke ee tasiꞌperiaꞌ otong tampaꞌnaꞌ teeꞌ naning narung boi dei niiꞌ ookara domang mooꞌmaripeuꞌ.” 51 Nka teie baka teeꞌ minkuvuaꞌ, tee Piristiꞌkoong Ovoring deemparitaaꞌ teeꞌ tarampeearuꞌ Jiisuuꞌ booꞌparaaꞌnaang niiꞌkoo Juꞌnupoong-koo. 52 Eeꞌnoko niiꞌ naing-koo deeaꞌ, ookara Kumponing baurukaaꞌ amutemuuꞌketa oosimuriiꞌnaang narung mono-pinaꞌ oꞌnoriiꞌnaang.

53 Teꞌmung-eta tutumpauꞌ Jiisuuꞌ tavaavaꞌnaang mumunsi-koo. 54 Eeꞌnoko teeꞌkoo Jiisuuꞌ baruꞌ sirapoꞌke nanuarukoꞌ Judiaꞌnameng-koo. Teketa tenkenuraiꞌnange niiꞌnooꞌ osi nanuuꞌ miring Eparaim, meeꞌboraꞌ sirakamaaꞌkoo dueꞌ. Eeꞌnoko teꞌ oꞌnorikoꞌ niiꞌ bakaning barevare-nupoong ninka.

55 Tenang Juꞌnupoong biikaang Paroro Baariꞌkoong~ dueꞌuuꞌnang. Mmauꞌ nantoong avuntevuntuꞌketa Jerusalemaꞌaape nanaakoꞌ neriarima kiiroraaꞌantavariaꞌnaang tee-koo paroro-koo makosinaꞌ. 56 Eeꞌnoko teinge Jiisuuꞌ besiꞌaakoꞌ teke, eeꞌnoko dootuuꞌnava pankava-koo oosiarima niaꞌeema aaꞌpeekoꞌ, “Dake arekeeꞌ noruꞌemaang? Tee paroro-koo pa poarooꞌnaang deeꞌma.” 57 Tero piristiꞌkoong ovontunge eeꞌnoko Boto Keperuuꞌnavitue boto nauaarima aaꞌpaaruꞌ, “Naninge tee Jiisuuꞌ otomanooꞌ noruꞌuraiꞌnange teie nauꞌka naumuriaing, teinge Jiisuuꞌ mooꞌaara kiimata-nava-koo sipaavaꞌnaang.”